భర్త అసహజ శృంగారం చేయమని ఒత్తిడి.. పోలీసులకు ఫిర్యాదు

పూణే : డాక్టరు అయిన తన భర్త తనతో అసహజ లైంగికకాండకు పాల్పడ్డాడని పూణే నగరానికి చెందిన ఓ మహిళా వైద్యురాలు పోలీసులకు ఫిర్యాదు చేశారు. పూణే నగరంలోని ప్రభాత్ రోడ్డు ప్రాంత నివాసి అయిన వైద్యుడితో బుల్దానా జిల్లాకు చెందిన తోటి డాక్టరు అయిన మహిళకు 2016 డిసెంబరులో వివాహం అయింది. వివాహం అయినప్పటి నుంచి తనను భర్త అసహజ శృంగారం చేయమని ఒత్తిడి తీసుకువచ్చాడని భార్య పోలీసులకు సమర్పించిన ఫిర్యాదులో పేర్కొంది. తనను అత్తవారిల్లయిన పూణేతోపాటు ఇండోనేషియా దేశ హనీమూన్ పర్యటనలోనూ అసహజ శృంగారం చేయమని భర్త వేధించాడని భార్య వెల్లడించింది. తనతో అసహజ శృంగారానికి అంగీకరించకుంటే విడాకులు ఇస్తానని తన భర్త వేధించాడని, దీంతోపాటు తన అత్తమామలు కూడా తనను వేధించారని కోడలు ఫిర్యాదు చేసింది. భార్య ఫిర్యాదు మేర బుల్దానా పోలీసులు ఐపీసీ సెక్షన్ 376, 377, 328,342, 498 సెక్షన్ల కింద కేసు నమోదు చేశారు. నిందితుడైన డాక్టరును అరెస్టు చేసిన పోలీసులు దర్యాప్తు సాగిస్తున్నారు.